O obxectivo deste programa de investigación é profundizar en como se produciu a transición entre procesos puramente químicos ata procesos biolóxicos complexos nas etapas iniciais do desenvolvemento da vida. Empregando unha aproximación bottom-up, levaranse a cabo experimentos en modelos de protocélulas onde moléculas sinxelas especialmente deseñadas poderán autoensamblarse de xeito controlado para faciliar a comprensión dos principios que rexen a definición de auto-sustentabilidade celular. En particular, deseñaranse novidosos péptidos helicoidais para acceder a arquitecturas supramoleculares de hélices super-enroladas que faciliten un incremento substancial da complexidade celular sen requirir dun grande esforzo sintético, o que facilitará acadar os obxectivos do programa.
Os ácidos nucleicos (ARN mensaxeiro, ADN, etc.) son biomoléculas que teñen un gran potencial terapéutico, aínda que precisan ser complementados con tecnoloxías que faciliten a súa chegada controlada ao seu lugar de acción dentro das células. Este programa de investigación pretende afondar nos esforzos iniciados hai 8 anos no grupo de investigación cara ao descubrimento de novas moléculas de base artificial que poidan transportar estes ácidos nucleicos tanto in vitro como in vivo. As estratexias pioneiras para o transporte de ácidos nucleicos consistirán na utilización de péptidos anfifílicos, clusters inorgánicos e novas formulacións de precursores químicos sinxelos que exploten o concepto de caotropicidade para atravesar membranas biolóxicas, a principal barreira que experimentan estas biomoléculas.
Os salientables resultados de investigación básica e aplicada desenvoltos no grupo de investigación permitiron identificar novas tecnoloxías relacionadas coa entrega de proteínas e outras biomoléculas de interese biolóxico e terapéutico que teñen potencial para resolver algunhas necesidades críticas da industria farmacéutica na actualidade. Polo tanto, o obxectivo deste programa de investigación é levar a cabo as últimas etapas do proceso de valorización e transferencia tecnolóxica para achegar as devanditas tecnoloxías a un estadio de maduración superior que permita a súa comercialización. A correcta implementación deste programa resultará na constitución dunha empresa spin-off que fará accesible as empresas e á poboación en xeral as tecnoloxías de entrega de biomoléculas totalmente funcionais e validadas.
Transferencia de coñecemento de entrega de ácidos nucleicos.