Espazos comunicativos como lugares de encontro socialDos teleclubs ás radios comunitarias en Galicia

Resumo

O lugar de encontro social, categoría central desta tese, supón a existencia dun espazo físico común que posibilita a participación, o diálogo entre as persoas e a relación de compartir, e que contribúe así mesmo ao fortalecemento do tecido asociativo. Baixo esta perspectiva, abórdase o estudo das radios comunitarias galegas, concretamente de Cuac FM da Coruña e de Radio Filispim de Ferrol. Inclúese ademais a revisión doutros espazos comunicativos de participación comunitaria en Galicia, os teleclubs, pois, malia as diferencias entre ambas as dúas experiencias, a visión destes últimos como centros de reunión e interacción da comunidade permite relacionalos coa idea do lugar de encontro social e as radios comunitarias.