Os factores de competitividade dos estaleiros na era globalo caso de Navantia, SA na ría de Ferrol

Resumo

Neste estudo de investigación, preténdese afondar no coñecemento sobre a competitividade dos estaleiros, e ir un chanzo máis alá da terna dos tres factores de competitividade clásicos (prazo, prezo e calidade). Así mesmo, preténdese ofrecer unha listaxe completa de factores de competitividade que, ademais de seren relevantes para a competitividade dos estaleiros, lle poidan resultar útiles ás persoas que os dirixen para detectar onde poden mellorar a súa competitividade. O documento céntrase primeiro en definir os conceptos centrais da investigación: competitividade; estratexia competitiva; factor de competitividade; e todos e cada un dos trinta e dous factores de competitividade detectados como relevantes na revisión bibliográfica. E despois, elabórase un modelo de análise para respostar tres preguntas sobre o caso de estudo (o núcleo industrial da empresa Navantia, SA na ría de Ferrol): 1) cales son os factores de competitividade máis importantes?; 2) cal é o grao de desenvolvemento dos factores sobre os que a empresa pode influír de xeito directo?; e 3) é competitivo o núcleo industrial? O modelo de análise empregado está baseado nun marco teórico e nunha metodoloxía que permiten o estudo doutros estaleiros empregando o mesmo modelo do caso de estudo desta investigación.