PABLO SANCHEZ QUINTEIRO

A miña principal liña de investigación céntrase no estudo anatómico e funcional dos sistemas olfactivos dos mamíferos, con especial atención ao sistema vomeronasal. O papel que desempeñan as feromonas na modulación da fisioloxía e do comportamento animal convérteas nun instrumento prometedor para intervir activamente na reprodución e no benestar animal. Non obstante, é necesario afondar no estudo das bases morfofuncionais dos sistemas olfactivos, algo que fun desenvolvendo ao longo da miña traxectoria empregando técnicas microscópicas histolóxicas, inmunohistoquímicas, de marcaxe con lectinas, ultraestruturais e de microscopía confocal. Diversas estadías de investigación permitíronme aprender e aplicar diferentes metodoloxías en centros como a Universidade de Salamanca (co Dr. J.R. Alonso), o Instituto de Neurociencias de Alacant (Dr. A. Fairén), a Universidade Autónoma de Madrid (Dr. C. Avendaño), a Universidade do Porto (Dr. A. Coimbra) e a Universidade de Edimburgo (Dr. C. Ingham). A aplicación destas técnicas deu lugar a resultados salientables: o meu grupo identificou e caracterizou molecularmente por primeira vez o bulbo olfactivo accesorio do can, estudou a funcionalidade do sistema vomeronasal durante a vida prenatal, empregou lectinas como marcadores específicos dos subsistemas olfactivos e analizou a zonación funcional do VNS en diferentes especies de mamíferos segundo a expresión das dúas principais familias de receptores vomeronasais. Recentemente ampliei o meu campo de estudo ao sistema olfactivo dos peixes e á aplicación de técnicas xenómicas e proteómicas para a caracterización das sinais semioquímicas implicadas na comunicación animal, co obxectivo de mellorar a produción e o benestar en cunicultura e o control de pragas de mamíferos, como a rata topo. Participei en cinco proxectos CiCYT e publiquei 70 artigos en revistas do JCR, a metade deles nos últimos cinco anos. Conto con cinco sexenios de investigación acreditados pola CNEAI —o último concedido en 2025— e sete tramos de Excelencia Investigadora acreditados pola Axencia para a Calidade do Sistema Universitario. O meu índice h en Google Scholar é de 28.