MARÍA OLALLA
LORENZO CARBALLA

Son unha bióloga evolutiva cun amplo interese na taxonomía, a evolución e a bioloxía da conservación. O meu principal grupo de estudo son os odonatos (libélulas e damiselas). Utilizo un enfoque multidisciplinar na miña investigación combinando experimentos, tanto de campo como de laboratorio, coa aplicación de técnicas moleculares e as posteriores análises xenéticas e bioinformáticas. A maior parte da miña traxectoria investigadora centrouse no estudo da bioloxía reprodutiva da especie de damisela Ischnura hastata, único caso de partenoxénese natural que se dá neste grupo de insectos. Colaboro habitualmente con investigadores nacionais e internacionais cos que comparto un interese común pola taxonomía, conservación e bioloxía evolutiva dos odonatos. Realicei o meu doutoramento sobre a bioloxía reprodutiva de Ischnura hastata no laboratorio do profesor Adolfo Cordero-Rivera (Universidade de Vigo), financiado cunha bolsa FPI. En 2014 obtiven un contrato posdoutoral financiado polo programa Marie Curie Intra-European Fellowships, para traballar na Universidade de Liverpool. Tamén traballei como investigadora posdoutoral nas universidades da Coruña e Vigo, e visitei varios laboratorios internacionais en México, Alemaña e Estados Unidos. Na actualidade son Profesora Axudante Doutora no Departamento de Zooloxía da Universidade de Santiago de Compostela (USC). Dirixín dúas teses de doutoramento (unha na Universidade de Oriente en Cuba, e outra na Universidade de Vigo), e teño impartido obradoiros e seminarios sobre desenvolvemento profesional e técnicas de redacción de proxectos, organizados pola British Ecological Society (BES). Participo de xeito habitual en actividades de divulgación, que inclúen a divulgación da importancia da ciencia e as actividades de investigación científica, a través de actividades dirixidas ao alumnado de primaria e secundaria, como charlas e obradoiros de investigación impartidos no Día Internacional da Muller e a Nena na Ciencia; e son membro do comité científico de Pontenciencia, actividade financiada pola Fundación Española para a Ciencia e a Tecnoloxía (FECYT) na que estudantes de primaria, secundaria e FP amosan os resultados da súa investigación científica. Tamén son nai no ámbito académico.