Dinamización do proceso de concentración parcelaria forestal a través de fotointerpretación e técnicas six

Resumen

Na actualidade, a cada vez meirande demanda, que está a xurdir pola necesidade dunha reorganización da propiedade forestal, precisa de procedementos específicos e máis áxiles que os das actuacións clásicas de concentración parcelaria en terreos agrícolas, que eviten en definitiva importantes mermas productivas. Como é ben sabido, Galicia caracterízase por unha atomización xeneralizada dos seus montes. Esta situación de minifundio forestal está a crear unha situación desfavorable para os selvicultores galegos, aínda tendo en conta a súa situación xeográfica favorable, con condicións edáficas e climatolóxicas idóneas para a producción forestal. Segundo o anterior, as solucións que se están levando á práctica pasan por unha potenciación do asociacionismo entre propietarios, vencellado a unha reestructuración da propiedade. Esto último responde á necesidade dunha superficie mínima que facilite a mecanización dos traballos selvícolas, á importancia das infraestructuras para realizar o aproveitamento forestal, etc. A optimización das devanditas técnicas, asociacionismo e concentración parcelaria forestal, veñen dadas por unha maior difusión das avantaxes do asociacionismo e por unha maior dinamización nas actuacións de reestructuración da propiedade. A ralentización deste procedemento, a miúdo atingue a cada unha das fases do proceso, producindo grandes perdas na producción forestal, así como o desalento dos propietarios dos montes afectados. Esto xustifica a necesidade dun maior dinamismo no proceso, realizando un procedemento abreviado para as concentracións parcelarias de carácter forestal, onde se minimice o tempo transcorrido entre a valoración do voo e a toma de posesión das fincas. Este último punto vese claramente favorecido cando empregamos as técnicas apropiadas para a realización do proxecto de concentración, tal e como se presenta neste traballo, que xa constitúe unha experiencia practicada con éxito noutros países veciños; baseada na utilización de ortofotos para a elaboración da cartografía, fotointerpretación de estereofotografías aéreas en color para a valoración das masas arbóreas (a través do cálculo de existencias) así como para determinar os usos do solo, e por último, as tarefas de análise para a elaboración da cartografía final, coa que se poden obter as fincas de retorno mediante a implementación dun Sistema de Información Xeográfica que aportará potencialidade, dinamismo e eficacia á devandita análise.